Trajnim për Menaxher të Sigurimit

Industria e sigurimit privat përbëhet nga ndërmarrjet private të cilat kryejnë shërbimin e sigurimit fizik për individë, ndërmarrje private apo publike, institucione qeveritare dhe/apo jo-qeveritare, me qëllim të mbrojtjes së jetës dhe/apo pronës dhe pasurisë, sipas kontratës dhe me qëllim të fitimprurjes për pronarët e tyre.

Punëtor i sigurimit fizik

Apo roje fizike quhet cilido person i cili paguet me shpërblim, mëditje, apo pagesë mujore për të kryer detyrat e caktuara në industrinë e sigurimit fizik.

Shërbimi themelor i sigurisë

Sipas ligjit është ruajtja statike dhe patrullimi i lëvizshëm për mbrojtjen fizike të pronës ose të një zone të sigurtë.

Në shërbimet themelore të sigurisë përfshihen:

Sigurimi i vendparkimeve publike
Mbrojtja e ndërtesave dhe objekteve nga sulmet me qëllim të vjedhjes apo dëmtimit
Shërbim i kujdestarisë dhe recepsionit nëpër hyrjet zyrtare
Patrullimi i zonave të caktuara
Kujdesi për vendparkimet publike
Intervenimi në rast të paraqitjes së alarmit
Veprimet e mbrotjes kundër zjarrit dhe veprimet fillestare të luftës kundër zjarrit

Poligoni i Shenjëtarisë “Katana” beson se aftësimi i punëtorëve të sigurimit sipas standardeve botërore është thelbësor për zhvillimin e industrisë së sigurimit në Kosovë.

Përcjellja dhe kontrollimi i përvetësimit të përmbajtjes mësimore për vijuesit e Kursit Themelor për Punëtor të Sigurimit, i dedikohet punëtorëve të cilët do të kryejnë punë dhe detyra të punës në sigurimin fizik në ndërmarrje, ndërtesa dhe institucione të tjera.

Qëllimi i organizimit të këtij kursi, është që vijuesit të përvetësojnë njohuritë dhe shkathtësitë e nevojshme të cilat janë të domosdoshme për kryerjen e punëve dhe detyrave në sigurimin fizik, si dhe aftësimin e tyre që në mënyrë të pavarur të: → → →

Ndërmarrin masat e nevojshme të sigurimit fizik gjatë ruajtjes së objekteve/ndërtesave, pasurisë dhe personelit.
Zbatojnë në praktikë rregullat nga fusha e sigurimit fizik.
Ndërmarrin masat preventive të mbrojtjes kundër zjarrit në hapësirat e mbrojtura.
Komunikojnë me mirësjellje me palët, klientin dhe zyrtarët tjerë.
Dinë të shkruajnë dhe të plotësojnë raporte dhe formulare zyrtare.
Jenë te aftë të parandalojnë dhe të zgjidhin konfliktet në vendin e punës.
Punojnë nën kushte të stresit.

MËNYRA METODIKE E REALIZIMIT TË MËSIMIT

"

Planprogrami mësimor i kursit themelor për rojet fizike është konceptuar në bazë të analizës dhe studimit të grupit të punës së Poligonit të Shenjëtarisë “Katana” dhe përvojës shumëvjeçare në industrinë e sigurimit fizik në Kosovë, regjion dhe në botë.

Ky planprogram përmban një materie të sistemuar në 8 fusha mësimore, në të cilat janë të përfshira të gjitha aspektet e punës dhe veprimit të shërbimit të sigurimit fizik.

Ky program ju mundëson vijuesve të Kursit Themelor për Roje Fizike që të fitojnë dituri të mjaftueshme nga fusha e sigurimit fizik, përkatësisht të aftësohen për të marrë obligime dhe përgjegjësi në punë. Planprogrami i Kursit Themelor për Roje Fizike, realizohet përmes metodës së ligjërimit dhe ushtrimeve praktike, me një kohëzgjatje prej 60 orëve mësimore, përkatësisht 10 ditë pune. Temat mësimore përpunohen veç e veç dhe u përcillen kursantëve përmes ligjërimit të ilustruar me mjete konkretizuese dhe demonstrimeve dhe ushtrimeve praktike.